Ѓоковиќ - Легенда којашто ја пишува историјата

Новак не само што победува, тој го редефинира поимот што значи да се биде шампион. Како симбол на упорност и извонредност, тој ја преобликува суштината на тенисот. Со 24 Гренд Слем титули и бројни рекорди, тој остава наследство коешто го поставува меѓу најуспешните играчи во историјата на овој спорт. Кариерата на Ѓоковиќ е одбележана со непоколеблива верба, неприкосновена отпорност и прилагодливост. Тој ја прифаќа ранливоста, си дозволува да падне, но и да се обнови, често уште посилен. Токму оваа ментална цврстина – способност да се справи со притисокот и да ги надмине препреките - го прави мој идол. Позади неговата мирна и скромна појава, понекогаш се крие, како што ја нарекува, „внатрешна бура“ - мешавина од сомнеж, страв и емоции што главно се активираат за време на тешки моменти и мечеви. Она што го прави различен, е неговата умешност директно да се соочи со предизвикот, да го прифати хаосот и неверојатно брзо да се врати во најдобра форма. Секој успех и неуспех го обликуваат неговиот карактер и придонесуваат за впечатливото присуство денес.

„Знам дека успехот не доаѓа одеднаш. Тоа не е нешто што се постигнува преку ноќ. Тоа е резултат на многу, многу, многу години работа и обиди за остварување на поставените цели.“ - Новак Ѓоковиќ

Ѓоковиќ не само што победува, туку и го унапредува спортот. Тој покажува дека вистинската големина не е во тоа да се биде само беспрекорен; таа вклучува и страст, духовна сила и посветеност. Им се восхитувам на неговите достигнувања - на, и надвор од теренот. Го величам овој пример за човек којшто е истраен во своите вредности, на, и надвор од теренот. Длабоко го почитувам сонувачот којшто не само што успеа да ја оствари својата визија, туку сега инспирира други и помлади генерации да не се откажуваат од замисленото.